14-vjeçari u mbyt në liqenin e Farkës, momenti rrëqethës kur shoku i tij iu tregon polumbarëve trupin e tij që pluskonte mbi ujë

Trupi i pajetë i një 14 vjeçari nga komuniteti rom është gjetur mëngjesin e sotëm mbi ujë në Liqenin e Farkës, teksa kishte shkuar për t’u larë me një shok të tijin.

I mituri ka humbur kontaktet me familjarët të enjten në mëngjës, më datë 3 shtator, dhe ata e kanë denoncuar në Polici. Pamjet e kamerave në zonë kanë filmuar momentin kur 14 vjeçari ishte drejtuar për në Liqenin e Farkës me shokun e tij. Ky i fundit e ka parë shokun e tij teksa mbytej por s’ka mundur ta ndihmojë, por as nuk ka treguar sepse ishte trembur.

Vetëm mbrëmjen e djeshme ai ka treguar, dhe menjëherë polumbarët e RENEA-s kanë shkuar në vendngjarje dhe kanë nisur kërkimin, të udhëzuar dhe nga i mituri. Por për shkak të errësirës operacioni për gjetjen e trupit të 14 vjeçarit është ndërprerë për të rinisur sot.

Ndërkohë, në orën 06.35 të mëngjesit të sotëm, familjarët e viktimës kanë shkuar vetë pranë Liqenit të Farkës dhe kanë gjetur trupin e tij duke pluskuar mbi ujë.