LIGJET E BIZNESIT
Partia Demokratike akuzoi Drejtorin e Departamentit të Sigurisë Publike Gjovalin Loka, se ka fshehur faktet se ka punuar në ish-Sigurimin e Shtetit. Këtë e referoi me seancën e Vettingut, të një dite më parë, ku zoti Loka u konfirmua në detyrë, pasi rezultoi i pastër në tre kriteret. Por e vërteta, bazuar në dokumente është krejt tjetër.
Në dokumentin e relatores së Komisionit të Jashtëm të Vlerësimit, saktësohet se subjekti, Gj. Loka nuk ndodhet në kushtet e fshehjes së të dhënave në formularin e kontrollit të figurës. Në vitet ’90, sot oficeri i lartë i Policisë së Shtetit, ka qenë ende student.
Ky është formulari i plotësuar nga zoti Loka, ku pyetjes 18, nëse ka qenë bashkëpunëtor apo i favorizuar nga ish-Sigurimi i Shtetit i është përgjigjur me JO.
KJV (Komisioni i Vettingut) e ka marrë përgjigjen edhe nga Autoriteti për Informimin për Dokumentet i Ish-Sigurimit të Shtetit, në një dokument, të datës 05.06.2020, ku citohet se Loka nuk ka patur lidhje me veprimtari të ish-Sigurimit të Shtetit.
Edhe përgjigja e Drejtorit të Përgjithshëm të Policisë së Shtetit, Ardi Veliu, e publikuar nga PD, është në të njëjtën linjë me përgjigjen e Autoritetit të Dosjeve.
Gjovalin Loka ka mbaruar shkollën në 30.06.1990. Më tej, nga data 05.08.1990 deri 16.01.1991 ai ka qenë në dispozicion të Degës së Punëve të Brendshme Kukës, pra në dispozicion dhe jo i emëruar.
Në 16.01.1991 Loka është emëruar si Punëtor Operative Zone. Por siç konfirmohet edhe nga Autoriteti i Dosjeve, nuk është gjetur asnjë dokument prej datës 29.01.1991 deri 01.06.1991, që të jetë hartuar dhe firmosur nga Gjovalin Loka, si dhe nuk rezulton të ketë rekrutuar bashkëpunëtorë, të ketë marrë informacioneve nga RSI gjatë kësaj periudhe, të ketë regjistruar ndonjë kontingjent për llogari të Sigurimit, apo të ketë pasur lidhje me veprimtari që ushtrojnë Sigurimi i Shtetit si ndalime, arrestime, këshillime, dëbime dhe internime.
