Detaje të reja kanë dalë në dritë nga vrasja e 57-vjeçarit Gëzim Saraçi në Gjirokastër. Mësohet se autori i dyshuar është Mihal Thimjo, i cili është arrestuar sot. Ata ishin miq me njeri-tjetrin dhe kërkonin flori.
Burimet pohuan për gazetaren Brikena Metaj se sherri mes tyre mund të ketë ardhur pikërisht për këtë shkak. Dyshohet se dy personat mund të kenë gjetur diçka pasi ata punonin me varroshe (gërmonin në varre).
Sipas dëshmisë së Thimjos, sherri banal nisi mbi motive nacionalizmi, por duket si një justifikim për të fshehur një të vërtetë tjetër dhe për të mos treguar veprimtarinë e jashtëligjshme që kanë kryer.
Dyshimet bien edhe mbi familjen nisur nga fakti që ai i lajmëroi, por nuk u gjend në vendngjarje kur ata shkuan aty.
Gëzim Saraçi dhe Mihal Thimjo kishin njohje të vjetër familjare me njëri – tjetrin, madje ditën e djeshme para vrasjes kishin qenë për një drekë në Poliçan të Zagorisë.
Në kthim ka ndodhur një konflikt i çastit që ka shkaktuar grindjen fizike mes tyre. 57-vjeçari Saraçi ka goditur i pari Thimjon, i cili është kundërpërgjigjur duke e goditur me levë 57-vjeçarin, i cili ka gjetur vdekjen. Autori 33-vjeçar është i plagosur në shpatull dhe në këmbë.