U gjet i vrarë në vilën e tij/ Biznesmeni ishte me nënshtetësi të huaj, duhet të largohej nga vendi

Para 2 ditësh u gjet i vrarë biznesmeni Eugert Lazaj, 37-vjeçar. Ai jetonte në një vilë private në kompleksin Rolling Hills, në Farkë.

Pranë trupit të pajetë u gjet arma, që sipas policisë, është përdorur nga viktima për t’u vetëvrarë. Megjithatë ende nuk dihet ekzaktësisht nëse është vetëvrarë apo është vrarë nga vrasës profesionistë.

Ndërkaq burime nga Drejtoria e Kufirit dhe Migracionit-Tiranë, kanë bërë publike për mediat disa dokumente sipas së cilave pronari i resort “Adorions Palace” në Maminas, Eugert Lazaj, kishte “llogari” ligjore-administrative e gjyqësore me policinë shqiptare.

Sipas informacionit zyrtar, biznesmeni ishte i lindur e rritur në Shqipëri, por Lazaj e ka lënë shtetësinë shqiptare qysh më 26.11.2004, në moshën 21-vjeçare, për të jetuar jashtë saj me shtetësi tjetër.

Sipas dosjes, pas shumë vitesh ai është rikthyer për të bërë biznes me resort turistik e për të jetuar përgjithnjë në Shqipëri, por Policia e Shtetit, nuk e ka pajisur me leje të përhershme, por vetëm më leje të përkohëshme “Tipi D/AE- Veprimtari ekonomike”, raporton Pamfleti.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Për motive që i dinë vetëm agjencitë e specializuara brenda e jashtë Shqipërisë, Policia e Shtetit i ka kërkuar viktimës Eugert Lazaj, të largohej nga territori i Shqipërisë.

Në datën 01.04.209, Lazaj i është drejtuar Gjykatës Administrative, me padi dhe kërkesën për sigurim padie, me objekt, anullimin e urdhrit të dëbimit. Por qysh atëherë e deri ditën kur paditësi u gjet pa jetë, relatorja gjyqësore B.Hasa, nuk caktoi datë për fillimin e procesit të gjykimit.

Ende nuk ka një informacion të plotë, se përse policia i kishte bërë urdhër dëbimi e përse viktima Eugert Lazaj, nuk e pranonte dëbimin nga Shqipëria, shtetësinë e të cilës e kishte lënë qysh para 16 vitesh.