Radha torturuese në Kakavijë/ Pala greke vendos karantinën 7 ditore, gjatë natës kaluan 700 qytetarë

Që prej ditës së sotme të gjithë ata që futen në shtetin grek do duhet të karantinohen 7 ditë. Ky është rregulli i shtuar nga pala greke.

Ndërkohë, mbrëmjen e sotme kanë kaluar kufirin 700 qytetarë dhe 300 automjete. Pala greke punoi edhe gjatë natës, duke ulur edhe paksa radhën kilometrike. Tashmë vargu i makinave shkon deri në fshatin Zervat, rreth 6-7 kilometra larg pikës kufitare.

Duke filluar nga nesër, 17 gusht, nga pika kufitare e Kakavijës do të kenë mundësi të kalojnë vetëm 750 persona në ditë, ndërsa nga ajo e Kapshticës vetëm 300 persona në ditë, në fashën orare 06:00 deri në orën 22:00, konform rregullave të vendosura nga pala greke.

Kushtet që çdo qytetar duhet të plotësoje për të kaluar pikën doganore dhe për t’u futur në Greqi nga e hëna janë:

– Testin negativ të COVID-19 (RT-PCR), i cili duhet të jetë kryer deri 72 orë para mbërritjes në pikën e kalimit kufitar, nga laboratorët publike apo private të certifikuara në Shqipëri. Ky rregull nuk vlen për shoferët e kamionëve që transportojnë mallra dhe fëmijët nën 10 vjeç.
– Vërtetimin diagnozë të përkthyer në anglisht, në të cilin duhet të jenë të shënuara emri, mbiemri dhe numri i pasaportës/numri i kartës së identitetit të individit.
– Vërtetimin e plotësimit të formularit të posaçëm PLF, me kodin QR (nga adresa elektronike.
– Testi i COVID-19 (RT-PCR) është i vlefshëm vetëm nga laboratoret e linçesuar nga Ministria e Shëndetësisë dhe Mbrojtjes Sociale, të cilat mund t’i gjeni në faqen zyrtare.