Biznesmeni Kosovar Behgjet Pacolli ka reaguar pasi Agjencia Kundër Korrupsionit në Kosovë publikoi formularët e pasurisë së tij.
Pacolli shprehet se nuk dëshiron të flitet për pasurinë në një moment të tillë, kur vendi po përballet me një krizë financiare. Sipas tij më me rëndësi në jetë ka shëndeti, familja dhe miqtë.
“Shikoj shumë komente dhe artikuj në media për pasurinë time të deklaruar, diçka që në të vërtetë nuk e dëshiroj. Jemi në mes të një krize financiare dhe pandemie, ku shumë familje e kanë shumë të vështirë të përballen me jetën e tyre të përditshme.
Gjëja e fundit që na duhet është të tregojmë se çfarë kemi me tepër në jetë. Më e rëndësishmja nga të gjitha janë shëndeti, familja dhe miqtë në jetë. Falënderoj Zotin për këtë”, shkruan ai.
Pacolli ka deklaruar se është zotërues i një avioni privat me vlerë 9.9 milion euro, si dhe 8 makina, 6 prej të cilave të tipit “Mercedes”, ku 2 kanë vlerë 200 mijë euro.