Ditën e sotme është ndarë nga jeta gazetari dhe zyrtari komunal i Gjakovës, Kastriot Shehdadi.
Lajmi i hidhur është bërë me dije nga dega e partisë Alternativa në Gjakovë, që vdekjen e Shehdadit e ka cilësuar një humbje të madhe për gazetarinë dhe komunën e Gjakovës.
Ende nuk dihen shkaqet e vdekjes së gazetarit, ndërsa për Shehdadin janë bërë dedikime të ndjera nga personat që kanë pasur lidhje të afërta me të .
Njoftimi i partisë alternative:
Kësaj radhe na tronditi lajmi për ndarjen nga jeta të gazetarit, publicistit dhe zyrtarit komunal Kastriot Shehdadi. Me Kastriotin bashkëpunuam për gjatë 4 viteve të qeverisjes në Gjakovë. Për Kastriotin nuk kishte rëndësi partia politike, ose kush e ka pushtetin. Ai gjithmonë përpiqej të ishte në krye të detyrës, ku me qetësinë që e karakterizonte dhe me aftësitë profesionale përmbushte përgjegjësinë që kishte.
Kastrioti adhuronte fjalën e lirë, e mbi të gjitha fjalën e shkruar shqip. Kastrioti pasuronte paraqitjet publike dhe zyrtare, me fjalime, lajme dhe njohuri të shumta që kishte. Humbja e Kastriotit është humbje për gazetarinë, zyrën për Informim të Komunës së Gjakovës dhe mbarë Gjakovën. Ngushëllime të sinqerta familjes Shehdadi, miqëve dhe bashkëpuntorëve.