Në lidhje me situatën e krijuar nga pandemia në Shqipëri, ka folur dhe kreu i Urgjencës Kombëtare Skënder Brataj.
Ky i fundit shprehet me nota optimiste përsa i përket të ardhmes por shton se kjo nuk duhet të ndikojë në uljen e vigjilencës dhe mosndjekjes së protokolleve përkatëse.
Brataj u shpreh se tamponët për personat familjarët e të cilëve kanë dalë pozitivë nuk janë të domosdoshëm nëse nuk ka simptoma.
“Detyrat janë të ndara për çdo institucion, ne kemi urgjencën, por në një situatë të tillë, nëse kanë një familjar me Covid, nuk është e domosdoshme bërja e tamponit, pasi edhe nëse tamponi del negativ në disa raste, nuk del pozitiv dhe për këtë ka shumë motive. Sepse nëse nuk ka simptoma nuk e jep shpesh edhe tamponi pa kaluar disa kohë. Shpesh këmbëngulet edhe pse pa simptoma për të hequr merakun.
Tamponi natyrisht është e vetmja mënyrë për ta zbuluar, por nuk ndodh gjithmonë që përgjigja të jetë vendimtare. Ka që dalin negativ, por nuk do të thotë se janë 100% të infektuar. Kur bëjmë tamponin mund të dalë negativ por nuk përjashton praninë e sëmundjes. Herë pas herë pacient pozitiv kanë dalë negativ dhe më pas janë kthyer në pozitiv. Po nuk pate shenja nuk është e thënë po ashtu se je negativ. Si prognozë e sëmundjes dhe si terapi nuk ndryshon asgjë. Në këtë periudhë mund të shfaqen edhe viroza të tjera të stinës.”, tha Brataj për Fax News.
Në lidhje me rikthimin e mundshëm të karantinës, Brataj e hodhi poshtë, duke thënë se nuk e mendonte as nuk do e rekomandonte, ndërsa theksoi se ashpërsim të masave mund të ketë nëse shtohen rastet dhe qytetarët nuk ndjekin udhëzimet.
Ai shtoi se nuk bën pjesë në grupin e personave që beson se do të ketë një valë të dytë, pasi virusi ndodhet tashmë mes nesh.
“Nuk është folur për karantinë, nuk do të ketë dhe nuk e këshilloj. Ndërkohë shtrëngimi i masave me rritjen e rasteve mund të vijojë. I kuptoj njerëzit për vështirësitë që kanë por shëndeti mbi të gjitha. Gushti do të jetë kështu. Shpresoj dhe mendoj se nga fundi i Gushtit dhe Shtatori të kemi numra drejt zbritjes. Nuk ka valë pas vale, siç flitet ka valë të parë valë të dytë. Virusin e kemi këtu”.
Brataj tha se gjithë çështja është për të mos kolapsuar sistemin shëndetësor, ndërsa pohoi se nuk është rritur vdekshmëria por shpeshtësia e përhapjes së virusit.
“Nëse numri i të infektuarve ndodh në kohë shumë të shkurtër, numri i pacientëve që kanë nevojë për shumë përkujdesje mund të krijojë kolaps në sistemin shëndetësor. Mendoj se nuk do të ketë ndryshime të mëdha katastrofike që kë kap virusi do humbi jetën, nuk është e vërtetë. Sot kemi mbi 3000 të infektuar, 114 janë në spital, të tjerët shumica nuk kanë as simptoma e disa ndiqen nëpër banesa. Është një sëmundje si gjithë të tjerat, nuk është shtuar vdekshmëria, por është shpeshtësia e përhapjes së virusit që na shqetëson”.