LIGJET E BIZNESIT
Ditën e sotme policia e Beratit me anë të një njoftimi bëri me dije se ishte shpallur në kërkim S. Q., 61 vjeç, banues në Tiranë, administratori i një subjekti, për shkak se ka dëmtuar habitatin në Malin e Tomorrit duket ngarkuar mjete me gurë dekorativ.
Ndërkohë, mësohet se bëhet fjalë për shtetasin Selim Qama, i cili është njëkohësisht dhe babai i deputetit të opozitës së re Klajdi Qama, i cili hyri në Kuvend pasi kolegët e tij të LSI dogjën mandatet në shkurt të 2019.
Kujtojmë se Qama ishte në listën e kandidatëve për deputetë në qarkun e Beratit.
Shpallja në kërkim e këtij Selim Qamës u bë pasi shërbimet e Komisariatit të Policisë Skrapar, në bashkëpunim me punonjës të Administratës së Zonave të Mbrojtura Berat, në aksin dytësor Novaj–Pronovik, në vendin e quajtur “Qafa e Sqepurit”, kanë konstatuar me dy mjete, njëri pa targa, të ngarkuar me pllaka guri dekorative, të nxjerra në Malin e Tomorit, zonë e shpallur “Park Kombëtar”, duke dëmtuar habitatin natyror të zonës së mbrojtur.
Bashkë me shpalljen në kërkim të babait të deputetit, policia arrestoi edhe dy shtetas të tjerë, që dyshohet se materialin e gurit të nxjerrë në mënyrë të paligjshme në këtë zonë e tregtonin duke pasur aktivitetin me status të pezulluar dhe me fatura fiktive.
Materialet iu referuan në Prokurorinë pranë Gjykatës së Shkallës së Parë Berat, për veprat penale “Dëmtimi i habitateve në zonat e mbrojtura mjedisore”, ‘’Fshehja e të ardhurave’’ dhe “Mospagimi i taksave dhe tatimeve”.
