Duket se situata shqetësuese e krijuar nga pandemia në vend, ku shifrat e të infektuarve janë në rritje dita-ditës, e kanë vënë në lëvizje ministrinë e Shëndetësisë dhe grupin e ekspertëve anti COVID19.
Kjo do të thotë se po shikohet mundësia për të shtënguar masat që kufizojnë përhapjen e koronavirusit.
Në lidhje me këtë temë ka folur dhe drejtori i Urgjencës Kombëtare Skënder Brataj.
Ai deklaroi për Report TV se po mendohet për disa kufizime, por nuk do të ketë mbyllje të plotë dhe karantinë të detyruar si ajo që kaluam në periudhën mars-maj.
Brataj theksoi se qytetarët luajnë një rol të rëndësishëm në përhapjen ose jo të virusit ndaj nëse ata ndërgjegjësohen dhe janë të kujdesshëm, masat kufizuese nuk janë të nevojshme:
“Njerëzit duhet sa më shumë të ndërgjegjësohen që të bëjnë atë që varet nga vetë ata. Nëqoftëse nuk ka më shtretër, aparature, burime njerëzore, detyrimisht që do të ketë masa shtrënguese. Është në dorën e qyteterëve, ata duhet të ndërgjegjësohen”, shtoi Brataj.
Ai tha se një model që mund të ndiqet mund të jetë mbyllja e detyruar për një vatër infeksioni, deri në ndalimin e vatrës:
“Aty ku vatra është e madhe mund të ketë mbyllje të një vatre, të një biznesi që ka një numër të madh të infektuarish. Kur flasim për mbyllje nuk flasim për mbyllje të pa kontrolluar, për dy deri në tre javë”.
Brataj tha se çdo vend ku ka grumbullim njerëzit, ka rrezik për përhapjen e infeksionit, ndaj qytetarët duhet të ndërgjegjësohen për të mos u grumbulluar dhe për të zbatuar masat e rekomanduara: mbajtjen e maskave, ruajtjen e distancës dhe ruajtjen e higjienës personale.