LIGJET E BIZNESIT
Tre përfaqësuesit e opozitës së re parlamentare kanë deklaruar se janë pro marrëveshjes për Reformën Zgjedhore, që u arrit më 5 qershor.
Deuteti Artur Roshi është shprehur se bashkë me disa deputetë do ta votojnë marrëveshjen, pasi është dhe një nga kushtet e Bundestagut gjerman për çeljen e negociatave me BE.
“Është një marrëveshje e mbështetur nga të gjithë faktorët ndërkombëtarë. Për sa i përket prekjes së Kushtetutës, ajo përmbledh të drejtat natyrore të qytetarëve. Ajo është simbol i unitetit dhe emocioneve ndërkombëtare dhe ndërhyrja nuk duhet bërë në mënyrë të njëanshme. Partia Balli Kombëtar është një parti e hapur dhe ne kemi dalë gjithmonë mbi veten. Ne do të jemi pro kësaj marrëveshje, ne nuk morëm atë që deshëm, por është ajo që i duhet vendit. Ne para integrimit nuk mund të zgjedhim një rrugë tjetër, pasi ajo është kusht për hapjen e negociatave”, tha ai.
Ndërkohë, Troplini pohoi se Shqipëria ka vetëm dy rrugë për të ndjekur, BE dhe SHBA.
“Marr përsipër që të flas në emër të Ballit Demokrat Kombëtar. Që është formuar që në diktaturë. Ne kemi mbijetuar dhe kemi shuar përtej detit. Strategjia drejt BE dhe SHBA, janë dy rrugës. Nëse ka debat mes opozitës dhe maxhorancës, çdo kush duhet të tolerojë diçka dhe të heq dorë nga diçka. Kjo është një nga pikat e BE dhe Bundestagut”, tha ai.
Edhe deputetja Fatjona Dhimitri ishte pro marrëveshjes, madje deklaroi se çështja e koalicioneve është lojë e Ramës, ndërsa shtoi se konsensusi për këtë reformë është kusht për çeljen e negociatave.
“Si deputete e Kuvendit të republikës se Shqipërisë theksoj se çështja e koalicioneve, është lojë e Edi Rama. S’jam në Kuvend për të mbështetur Edi Rama. Jam në opozitë me Edi Ramën. Besoj tek Europa dhe nuk mund të pengoj integrimin e vendit, një marrëveshje e mbështetur nga ndërkombëtarët. S’mbahen peng nga Rama. Konsensusi për reformën është i vetmi kusht për negociatat”, pohoi Dhimitri.
