“Unë president dhe ti kryeministër”/ Rama e mohon sërish: Populli është më i mençur

Kreu demokrat, Lulzim Basha deklaroi se kryeministri Edi Rama i kishte bërë një ofertë “Unë president dhe ti kryeministër”.

Rama e mohoi nëpërmjet një postimi në Tëitter, por nuk është mjaftuar me kaq. Kreu i mazhorancës u shfaq në mbrëmje në edicionin qendror të lajmeve në Top Channel. Rama tha se ishte i keqardhur që politika bie në nivele të tilla.

“Kjo është e pavërtetë sepse e para unë nuk e shoh kështu politikën. E dyta, unë nuk kam mundësi ta bëj një gjë të tillë dhe e trete pikërisht se unë besoj që populli është më i mençur se unë, mendoj që i duhet lënë popullit të zgjedhë edhe deputetët, edhe se kush është kryeministri i radhës. Me keqardhje e them që Lulzim Basha duhet të mbajë në këtë rast anën e duhur të historisë së sotme dhe të nesërme dhe të jetë në anën e popullit dhe jo në barrikadën nga ku arrihet në pikën derisa tregohen barceleta të tilla” – tha ndër të tjera Rama.

Rama këmbëngul se heqja e koalicioneve parazgjedhore nuk bëhet për të marrë ai një bonus në zgjedhjet e rradhës duke minimizuar fuqinë e koalicionit opozitar. “Ideja që Edi Rama po e bën këtë sepse ka një interes të vetin është një ide që mund të funksionojë për propagandë, por nuk ka lidhje me realitetin” – u justifikua Rama.