Një ngjarje e rëndë ka ndodhur së fundmi në Fushë-Krujë.
Mësohet se një sasi lënde plasëse e dyshuar si tritol është vënë në banesën e një 17-vjeçareje, e cila për fat të mirë nuk ka shpërthyer.
Lënda plasëse u gjet nga e zonja e shtëpisë në derën kryesore, në mbrëmje.
Menjëherë sapo ka parë sasinë e tritolit në derën e shtëpisë, ajo ka njoftuar Policinë e Krujës e cila ka bërë të mundur çaktivizimin e lëndës plasëse dhe ka nisur hetimet për gjetjen e autorëve.
Bëhet me dije se banesa ku u shënua ngjarja është e 17 vjeçares nga Nikla, e cila shfrytëzohej seksualisht nga katër persona të tjerë, që qëndronin në zonë dhe kultivonin kanabis.
Në njoftimin zyrtar që dha dje policia e Krujës, u njoftua se pas një operacioni, hetimet e së cilit kishin zgjatur 8 muaj, u prangosën
4 shtetas të cilët kultivonin kanabis dhe shfrytëzonin seksualisht një 17 vjeçare. Kështu, u kapën dhe u ndaluan shtetasit:
-E. C. (Ç)., 28 vjeç, banues në fshatin Nikël, Krujë;
-F. L., 25 vjeç, banues në fshatin Borizanë, Krujë, i dënuar më parë për veprën penale “Prodhimi dhe shitja e narkotikëve”, në Itali;
-L. S., 17 vjeç dhe A. Sh., 26 vjeç, banues në Krujë;
Gjithashtu janë shpallur në kërkim shtetasit A. B., 23 vjeç, i dënuar më parë për veprën penale “Drejtim i automjeteve në mënyrë të parregullt” dhe A. M., 17 vjeç, të dy banues në Krujë dhe vijon puna për kapjen e tyre.
Nga hetimet e kryera ka rezultuar se këta shtetas, në bashkëpunim me njëri-tjetrin, ushtronin veprimtari kriminale në fushën e prodhimit dhe shitjes së narkotikëve. Gjithashtu, këta shtetas kanë nxitur për përdorimin e drogës një 17-vjeçare dhe e kanë shfrytëzuar seksualisht atë.
