“Tamponët me racion”/ Reagon ISHP: Mos bëni politikë me pandeminë, kemi 90 mijë teste

Partia Demokratike, nëpërmjet ish-deputetit Bardh Spahia, ka akuzuar Ministrinë e Shëndetësisë për tamponët, që jepen me racion ose me qoka.

I menjëhershëm ka qenë reagimi i Institutit të Shëndetit Publik. Ata kanë deklaruar se janë të disponueshëm rreth 90 mijë teste për të iu përgjigjur situatës së pandemisë.

Ndër të tjera, ISHP thekson se në këtë situatë nuk është koha të bëhet politikë dhe nuk duhet cënuar puna e një ekipi të shëndetësisë.

Deklarata e plotë:

Instituti I Shëndetit Publik vijon të jetë 24 orë në 7 ditë të javës në përgjigje të nevojave nga I gjithë vendi për testimet në kohë të qytetarëve të dyshuar, sipas hetimit epidemiologjik që kryhet në terren nga epidemiologët.

Aktualisht kemi rreth 90 mijë teste në dispozicion dhe laboratori I ISHP vijon të furnizohet pa ndërprerje. Stafi i ISHP-së po punon 24 orë pa ndërprerje që nga fillimi i epidemisë, për të nxjerrë sa më shpejt në kohë përgjigjet për të gjitha rastet e dyshura si të prekur nga pandemia.

I bëjmë thirrje PD dhe çdo force politike, të mos bëjnë politikë me virusin dhe të mos cënojnë punën e një ekipi të tërë të shëndetësisë, që janë në krye te detyrës për përballimin e situatës, por t’I bashkohen përpjekje për të rritur ndërgjegjësimin e qytetarëve për respektimin e rregullave të distancimit fizik, vendosjes së maskës dhe ruajtjes së higjienës.