Në lidhje me studimin e Akademisë së Shkencave që u bë përsa i përket situatës së pandemisë në Shqipëri, ka folur dhe mjeku i njohur imunolog, Genc Sulçebe.
Ky i fundit ka treguar se si u bë studimi dhe në cilat zona të Tiranës janë marrë kampionët e gjakut.
Më pas aty ka rezultuar se një nga zonat me pozitivitetin më të lartë është njësia numër 9 në kryeqytet.
“Ne përzgjodhëm një kampion nga dhuruesit e gjakut. Falënderojmë qendrën e dhurimit të gjakut. Ne bëmë një studim për antitrupat në fund të majit. Në 128 dhurues vetëm një doli pozitiv. Që tregon qartë që në muajt e parë të epidemisë qarkullimi i virusit në popullatën tonë ka qenë shumë i ulët. Në javën e parë të korrikut në aplikuam të njëjtin studim në një kampion më të madh individësh që u përzgjodhën në 4 qendra Shëndetësore në Tiranë, u përzgjodhën në mënyrë të rastësishme.
Rezultatet ishin të tilla, në Qendrën Shëndetësore 3, doli me 6.3 % të individëve, rreth 79 individëve ishin pozitivë antitrupat ndaj SARS-COV 2. Në Laprakë pozitiviteti ishte 0. Në lagjen 8 pozitiviteti ishte 2.8%. Në lagjen 9 përqindja ishte më e lartë 17, 5%. Është një përqindje relativisht e ulët në krahasim me vende të Evropës që kanë një përqindje mesatare rreth 10%”, tha Sulçebe.
Sa i përket pozitivitetit të ulët në muajt e parë, ai tha se masat e lëvizjes së njerëzve në muajt e para kanë qenë të rrepta dhe qarkullimi i ulët çka ka sjellë dhe pozitivitet të ulët. Sulçebe tha se duhet evituar një rritje e mënjehershme.
“Në këto ditë kemi një rritje të konsiderueshme të qarkullimit të virusit që shihet dhe nga shifrat e sëmundshmërisë. Presim që në muajt në vazhdim të jetë më e lartë.
Tani popullata nuk është e izoluar, pozitiviteti do rritet por duhet të evitojmë rritjen e menjëhershme. Me rritjen e qarkullimit të virusit do ketë dhe raste të rënda. Masat duhet të jenë sa më të rrepta, maskat sepse është rruga më e mirë për parandalimin e virusit, ndryshe do kemi dhe raste të rënda. Jemi shumë-shumë larg atyre shifrave të ashtuquajtura imunitet i tufës që është rreth 50-60%. Ne nuk duhet të presim që të shkojmë drejt asaj sepse mund të kemi pasoja negative”, deklaroi mjeku.
Ai tha se maskat duhet të mbahen në mënyrë të vazhdueshme. “Mundësisht maskat t’u jepen atyre që s’kanë mundësi dhe falas. Të rritet disponibiliteti i maskave. Këto masa duhet të merren deri sa të jetë i mundur prodhimi i vaksinës, që pritet të ndodhë në 6 muajt që vijnë. Për 6 vjet duhet të rrisim masat e kufizimit që të parandalojmë sëmundshmërinë e lartë dhe humbjet në këtë periudhë tranzitore deri në aplikimin e vaksinës e cila është e vetmja mënyrë për të rritur imunitetin e tufës. Duhet të kemi një diapazon të paktën 2 muaj për të parë si evoluon. Këtë muaj ne shikojmë se kemi një përparim të infeksion. Presim që ky studim të vijojë në shtator-tetor”, tha ai.
Sa iu përket testimeve serologjike, Sulçebe tha se kanë vlerë individuale që çdo njeri të dijë që ka rënë në kontakt me këtë virus në dy javët e fundit apo jo. “Ky test nuk ka vlerë për diagnozën. Në 10 ditët e para testi mund të jetë negativ, duhet të kalojnë 10 ditë për ta parë nëse kemi krijuar antitrupa. Nga ana tjetër ka vlerë për të bërë një studim të përgjithshëm për evolucionin e infeksionit në popullatë”, tha ai për News24.
