Situatë shqetësuese në Spitalin Infektiv/ Dy pacientë ndërrojne jetë, ja sa janë në gjendje të rëndë

Në 24 orët e fundit dy persona kanë humbur jetën si pasojë e infektimit nga pandemia.

Deri më tani numri i viktimave nga virusi në vendin tonë ka shkuar në 95.

Bëhet fjalë për një burrë nga Shkodra dhe një grua nga Tirana.

“Në 24 orët e fundit, nuk e kanë fituar dot betejën me sëmundjen 2 qytetarë: Një 70-vjeçare nga Tirana dhe një pacient 66-vjeçar nga Shkodra, me sëmundje bashkëshoqëruse. Ministria e Shëndetësisë dhe Mbrojtjes Sociale u shpreh ngushëllime familjarëve të të ndjerëve“, tha Eugena Tomini nga ISHP.

Ndër të tjera në 24 orët e fundit, Ministria e Shëndetësisë ka bërë me dije se në 24 orët e fundit ka shtim të pacientëve të shtruar në Spitalin Infektiv.

Aktualisht janë të shtruar në spital 85 pacientë, 10 janë në terapi intensive dhe 4 prej tyre janë të intubuar, në gjendje të rëndë.

Spitali Infektiv ka 120 shtretër dhe numri i personave që po kërkojnë ndihmë mjekësore është shumë më i lartë se periudha që konsiderohej si piku i pandemisë.

Kujtojmë se ditën e sotme u shënua një rekord shifrash, ku në 24 orët e fundit u shënuan 117 raste të reja.