Seriali “Haklaj”, tërhiqet mjeku që do të lunte Fatmirin

Historia e bujshme e familjes Haklaj në Tropojë do të pasqyrohet në një serial me katër pjesë.

Seriali do të jetë një bashkëpunim suedezo-shqiptar dhe rolin e Fatmir Haklaj do ta luajë mjeku nga Fieri Jurgen Malaj. Ai është përzgjedhur në këtë rol për ngjashmërinë e madhe që ka me Fatmir Haklajn.

Por ditën e sotme Jurgen Malaj ka bërë publik vendimin e tij, duke thënë se refuzon të ketë rolin kryesor në këtë serial, për disa arsye. Sipas tij, një film i tillë nuk mund të realizohet pa u dhënë fillimisht drejtësi për çeshtjet në fjalë. Ai shton se është e vështirë, gati e pamundur të luash rolin e një Fatmirit, kur personat e tjerë të përfshirë në ngjarje janë ende të fuqishëm dhe të etur për gjakmarrje.

Rreth 35 milion euro janë mbledhur deri tani për këtë projekt të një regjisori suedezo-amerikan në bashkëpunim me një regjisor nga Kosova. Po ashtu shumë aktorë shqiptarë do të përmbushin rolet e tjera.

Organizatorët shprehen se seriali nuk ka për qëllim të bëhet palë me familjen Haklaj, por të vendosë theksin mbi fenomenin e gjakmarrjes.