Pas miratimit të ndryshimeve Kushtetuese në Parlament për hapjen e listave dhe heqjen e koalicioneve para zgjedhjeve, ka ardhur reagimi i kryetarit të PD Lulzim Basha.
Ky i fundit ka dalë në një deklaratë së bashku me aleatët e tij dhe ka theksuar se kryeministri Edi Rama e do Shqipërinë vetëm për interesat e tij personale.
Sa i takon ndryshimeve kushtetuese, ai theksoi se nuk janë të detyrueshme për opozitën dhe as për qytetarët shqiptarë.
Po ashtu ai u shpreh se koalicioni opozitar është koalicion me popullin shqiptar dhe se Edi Rama nuk do të mund ta ndalë rotacionin politik.
“Shqipëria i është dashur Edi Ramës vetëm për interesat e tij personale, por nuk do ia dalë.
Edi Rama e di se koha e tij po mbaron. Ai e ka humbur besimin e shqiptarëve.
Ai mendon se ndryshimet e njëanshme do zgjasin agoninë e pushtetit të tij, por ndryshimet janë të papranueshme dhe nuk janë të detyrueshme për opozitën dhe as shqiptarët. Ai sot tregoi fytyrën e autokratit të tmerruar për ndëshkimin që e pret. Makinacionet e tij nuk kanë për ta ndaluar rotacionin.
Koalicioni ynë është me shqiptarët, jemi bashkë për ta bërë këtë ndryshim.
Atyre që kërcënojnë ne do iu tregojmë se nuk ka më kthim pas.
Ne do vazhdojmë betejën për të mbroj demokracinë, asgjë nuk e ndal koalicionin mbarëpopullor kundër Ramës”-tha Basha.