Në ceremoninë e përurimit të Memorialit të Holokaustit ditën e sotme, ishte e pranishme dhe ambasadorja e SHBA në vendin tonë Yuri Kim.
Ajo tha se historia e mbrojtjes dhe shpëtimit të hebrenjve në Shqipëri është frymëzuese.
Gjatë fjalës së mbajtur Kim tha se një komb i tërë punuan për këtë gjë dhe e konsideroi si “histori të besës shqiptare”.
Ndër të tjera ambasadorja shtoi se SHBA ka vlerësuar guximin e popullit shqiptar.
“Pas ngritjes në pushtet të fuqisë së Hitlerit, shqiptarët strehuan me qindra hebrenj nga e gjithë Europa, duke i shpëtuar ata nga vdekja e sigurt. Kur pushtuesit kërkuan një listë të qytetarëve hebrenj nga qeveria shqiptare, ata refuzuan. Shqiptarët nga të gjithë sferat e jetës, u bënë të gjithë bashkë, një komb i tërë, punuan për të shpëtuar hebrenjtë, për të shpëtuar miqtë e tyre.
Është me të vërtetë një histori frymëzuese e kurajës e ndjerit, e besës shqiptare. Jam shumë krenare që qeveria e SHBA, ka mundësi të vlerësojë guximin e popullit shqiptarë përmes këtij memoriali. Do të doja të falënderoja popullin shqiptar, që na dha një shembull të ndritshëm. Le ta bekojmë të gjithë kujtimin e popullit të Shqipërisë që veproi me vetëmohim për mbrojtjen e miqve të tyre hebrenj. Ky memorial na kujtoftë gjithmonë vlerën e veprimeve të tilla. U frymëzofshim nga kuptimi i miqve tanë shqiptarë e hebrenj për humanizmin”, u shpreh Yuri Kim.
