Pas 4 muajsh/ Ky është shteti në Europë që nuk shënon asnjë viktimë nga pandemia për 24 orë

Belgjika është një nga shtetet më të prekura nga pandemia në pjesën e Europës Perëndimore.

Por së fundmi, për herë të parë që nga 10 marsi, aty nuk është raportuar asnjë viktimë për 24 orë.

Agjencia ndërkombëtare e lajmeve “Reuters” shkruan se njësoj si në shumë shtete evropiane që u goditën rëndë nga pandemia në mars dhe prill, Belgjika arriti ta kufizonte përhapjen e virusit përmes masave të izolimit, të cilat tani janë duke u hequr.

Instituti Kombëtar i Shëndetit Publik, Sicensano, njoftoi se numri i përgjithshëm i viktimave mbetet 9,787. Si shtet me 11.5 milion banorë, Belgjika i ka shënuar 850 viktima për një milion njerëz, që është niveli më i lartë në botë, me përjashtim të San Marinos, që ka shumë pak banorë. Më së shumti viktima për 24 orë janë regjistruar më 12 prill – 343.

Lakorja e infeksioneve të konfirmuara ka rënë në masë të ndjeshme, ndonëse numri mesatar i rasteve ditore gjatë shtatë ditëve të kaluara është rritur për 11 për qind në krahasim me një javë më parë.

Qeveria belge do të mbajë një mbledhje të mërkurën, ku do të diskutohet për lehtësimin e mëtejmë të masave të izolimit pas vendimit për ta bërë të detyrueshëm përdorimin e maskave në dyqane, kinema dhe muze, që u mor më 10 korrik.