Një javë para fundit, Superliga shqiptare mbyll të gjitha llogaritë

Ka mbetur për tu luajtur edhe një javë tjetër në Superligën shqiptare, por e gjitha do të jetë thjesht rutinë, pasi tashmë verdiktet e kampionatit janë përcaktuar të gjitha.

Pas rezultateve në ndeshjet e djeshme, përveç Tiranës kampione, janë përcaktuar edhe ekipet që do luajnë në Europa League, që janë përkatësisht Kukësi dhe Laçi.

Teuta gjithashtu ka siguruar një biletë, pasi është në finale e Kupës së Shqipërisë dhe çdo rezultat aty e çon sërish në Europë.  Kështu mbeten thatë, Skënderbeu dhe Partizani që nuk do të kenë pjesëmarrje në Europë këtë sezon.

Ndërsa Bylisi ia ka dalë që në rikthimin e tij në Superligë të shmangë edhe play out, pasi atë do ta luaj Vllaznia, e cila pasi u mposht nga Partizani e shikon veten 5 pikë më pak se ballshiotët.

Ndërkohë më herët ishin përcaktuar edhe dy ekipet që do bien nga kategoria, Flamurtari dhe Luftëtari, të cilat do të zëvendësohen nga Apolonia dhe Kastrioti.