Gjyqtari i Apelit të Shkodrës Selim Kryeziu është shkarkuar nga detyra.
Vendimi është marrë nga Komisioni i Pavarur i Kualifikimit (KPK) dhe është njoftuar ditën e sotme.
Trupa që kreu rivlerësimin e gjyqtarit në tre kritere kryesohej nga Valbona Sanxhaktari, ndërsa relatore ishte Etleda Çiftja dhe anëtare Xhensila Pine.
Seanca dëgjimore është zhvilluar javën e kaluar.
Tre raste të dyshuara mitmarrje të përshira në një raport negativ të DSIK-së dhe problemet me pasurinë iu bënë me dije gjyqtarit të Gjykatës së Apelit të Shkodrës, Selim Kryeziu nga KPK. Po ashtu, iu vu në dukje edhe mungesa e burimeve për pasurinë dhe disa mosdeklarime.
Kryeziu e ka nisur karrierën në sistemin e drejtësisë në vitin 1998 si gjyqtar në Gjykatën e Librazhdit. Ndërkohë, në vitin 2006, ai është emëruar inspektor pranë Këshillit të Lartë të Drejtësisë, ndërsa në vitin 2012 u promovua si gjyqtar në Gjykatën e Apelit të Shkodrës.
Sipas një raporti të Birn, gjyqtari Selim Kryeziu rezultoi me burime të pamjaftueshme financiare për të justifikuar shtimin e pasurisë në vitin 2005 dhe 2015; përkatësisht në vlerat e 204 mijë dhe 1.4 milionë lekëve. Gjatë këtyre viteve, subjekti ka deklaruar vit pas viti kursime në cash, por në asnjë rast nuk deklaron pakësimin e tyre me qëllim investimet në pasuri të patundshme.