“Maska është e detyrueshme”/ Manastirliu: Rastet kanë tendencë të rriten

Ministrja e Shëndetësisë, Ogerta Manastirliu ka folur në lidhje me situatën e shkaktuar nga pandemia. Vetëm ditën e sotme janë shënuar 117 raste të reja infektimesh dhe 2 vdekje.

Manastirliu tregoi se është duke fuqizuar ekipin e terrenit për gjurmimin e rasteve të reja dhe bëroi apel për të gjithë qytetarët.

“Në këtë fazë të epidemisë ku qytetet si Shkodra, Durrësi, Tirana dhe qytete kanë shënuar shifra të larta, kërkohet një përgjegjësi dhe sjellje individuale në raport me masat. Janë armët e thjeshta që secili prej nesh duhet t’i zbatojë në mënyrë që të ulë përhapjen e virusit”, u shpreh ajo në emisionin “Top Talk”.

Manastirliu nuk harroi të kujtonte vendosjen e maskave dhe theksoi se shifrat kanë tendencën për t’u rritur, në ditët në vazhdim.

“Transporti publik është një ndër shërbimet ku maska është e detyrueshme. Nuk mund të kesh akses në transportin publik nëse nuk ke maskën. Maska është fuqimisht e rekomanduar për tu përdorur në ambientet e mbyllura dhe në vendet ku nuk mund të mbahet distanca sociale.

Ka patur një rritje të qëndrueshme. Jemi në një kurbë me një rritje të qëndrueshme, por sigurisht vërehet një tendencë në rritje. Deri në këtë fazë është e kontrollueshme. Rastet do të shtohen në muajt korrik-gusht”, nënvizoi Manastirliu.