LIGJET E BIZNESIT
Një nga vendimet më të forta të ministrisë së Shëndetësisë që do të hyjë në fuqi së shpejti është mbajtja e maskës me detyrim në disa ambjente.
Në lidhje me këtë gjë ka folur dhe Eugena Tomini, shefja e epidemiologjisë në ISHP.
Ajo e ka sqaruar këtë vendim, si një masë të domosdoshme për të mbrojtur shëndetin e qytetarëve dhe për të kufizuar përhapjen e pandemisë.
Në një lidhje live me Abc News, Tomini tha se përdorimi i maskës në ambientet e mbyllura do të përcaktohet sipas sipërfaqeve të përcaktuara të distancimit fizik dhe respektimit të kësa hapësire.
“Të gjithë ambientet e mbyllura që nuk kanë hapësirë me përqindjet përkatësisht sipas subjekteve që ata zotërojnë sigurisht që do të jetë një element vendimtar për mbajtjen e maskës brenda ambienteve. Gjithë insituticionet publike, dhe jo publike që operojnë me hapësira të mbyllura dhe që nuk kanë hapësirën e duhur për t’u përcaktuar sipas niveleve të sigurisë si ambientet e hapura, detyrimisht do të mbajnë të gjithë maskën pavarësisht nëse do të kenë sipërfaqe të përcaktuara mirë përsa i përket edhe distancimit fizik. Një ambient i mbyllur pavarësisht lehtësimit të një sipërfaqeje për distancimin fizik nuk mund të lejojë që të mos mbahet maska. Brenda çdo ambienti të tillë maska do të jetë detyrim.”, u shpreh Tomini.
Ndërsa për në ambientet e shtëpisë, ajo tha se do të bëhet e domosdoshme përdorimi në rast se bëhet fjalë për persona që janë të dyshuar si të infektuar deri në periudhën e përfundimit të vetëkarantinimit.
“Në ambientin e shtëpisë duhet mbajtur një maskë për personat që janë në vetëizolim, që kanë shenjat minimale, mesatare dhe monitorohen nga strukturat përgjegjëse dhe një person që i shërben një tjetri që është me shenja të dyshuara dhe është i vetëizoluar në shtëpi, sigurisht personi dueht të mbajë patjetër maskën për të gjithë periudhën e karantinimit apo 21 ditë për të cilin ai negativizohet.“, deklaroi Tomini.
