Masat kundër pandemisë/ Manastirliu njofton vendimin më të fundit të qeverisë

Qeveria ka marrë së fundmi një vendim të rëndësishëm në kuadër të frenimit të pandemisë.

Kështu, maskat do të bëhen të detyrueshme për ambientet e mbyllura.

Ndërkohë qeveria ka nxjerrë dhe aktin normativ ku mbajtja e maskës do të jetë e detyrueshme për këto ambiente dhe për shkelësit do të sanksionohen gjoba.

Sipas ministres së Shëndetësisë Ogerta Manastirliu përdorimi i barrierave mbrojtëse nga çdo qytetar është një masë efikase e pranuar botërisht për kufizimin e përhapjes së pandemisë dhe uljen e numrit të të infektuarve.

Pas mbledhjes së qeverisë, Ministrja e Shëndetësisë dhe Mbrojtjes Sociale deklaroi se ky vendim, është një tjetër hap drejt forcimit të masave për frenimin e përhapjes së pandemisë.

“Nëpërmjet vendimit të sotëm të qeverisë dhe aktit normativ, detyrimi për përdorimin e maskave jo mjekësore/barrierave mbrojtëse për mbrojtjen ndaj transmetimit të virusit do të jetë detyrim për çdo individ në të gjitha ambjentet e mbyllura; në administratën publike dhe jo publike; në transportin publik; në zyra, shkallë pallati, ashensorë, në qendrat tregtare, dyqane, supermakatat, tregjet dhe njësitë e shërbimit”, – tha Manastirliu.

Në rast të mosrespektimit të këtij detyrimi, policia e shtetit, policia bashkiake, strukturat e inspektoriateve shtetërore, do të penalizojnë me gjobë shkelësit. Masa e gjobës është vendosur 2 mijë lek të reja për çdo thyerje të rregullit.

Ministrja e Shëndetësisë kërkoi mirëkuptimin e qytetarëve për zbatimin e kësaj mase që ndërmerret me qëllim mbrojtjen e shëndetit.

“Detyra dhe qëllimi ynë kryesor është ruajtja e shëndetit. Në funksion të këtij qëllimi, kemi miratuar edhe këtë Akt Normativ dhe për të cilin kërkojmë mirëkuptimin tuaj. Përdorimi i maskës ka një efikasitet të lartë në kufizimin e përhapjes së virusit, mbështetur kjo dhe në rekomandimet e Qendrës Europiane te Kontrollit të Sëmundjeve, Organizatës Botërore të Shëndetësisë dhe e vërtetuar nga eksperienca e shumë vendeve. ‘Sakrifica’ që kërkohet prej jush nuk është mbyllja. Ajo çfarë kërkohet është vendosja e maskës, për të mbrojtur veten, për të mbrojtur të afërmit”, – tha Manastirliu.