Ditën e sotme Gjykata e Apelit Tiranë ka dhënë masën e sigurisë për Adiola Lakrën.
Kjo e fundit dyshohet se nxori në pritë Hekuran Billën, i cili mbeti pa jetë pas një atentati në zonën Komuna e Parisit muajin e kaluar.
Në dëshminë e saj 26-vjeçarja ka deklaruar se nuk ka lidhje me ngjarjen dhe nuk pranon të jetë paguar për një gjë të tillë.
Lakra tregoi se Sebastian Mali, me Instagramin e saj i ka bërë ftesë Hekuran Billës.
Gjithashtu 26-vjeçarja i tregoi grupit të hetimit të gjitha vendet ku ka shkuar me Sebastian Malin gjatë kohës kur ishin të lidhur bashkë, duke ndihmuar grupin e hetimit për të gjetur prova të reja që vërtetojnë përfshirjen e Malit dhe Viktor Markut.
Lakra dyshohet si një nga personat që ka informuar autorët për lëvizjet e Hekuran Billës pasi do ta takonte mbrëmjen e 11 qershorit.
Adiola Lakra, 26- vjeçarja nga Berati dyshohet se kishte kontakte dhe ishte në një marrëdhënie me Hekuran Billën, i cili kishte vetëm 5 ditë që ishte kthyer nga Belgjika, ndërkohë që në Angli kishte vuajtur dënimin me burg për vrasjen e një bashkëkombasi, Prel Markut, vëllai i të cilit mori hak 14 vite më vonë në Tiranë për të ekzekutuar Hekuran Billën.
Viktor Marku u arrestua pak ditë më vonë në Mal të Zi teksa më parë u arrestua Sebastiano Mali, nipi i tij i cili u bë bashkëpunëtor në vrasje.