Një patrullë e policisë së Kosovës është qëlluar me armë zjarri. Mediat vendase raportojnë se ngjarja ka ndodhur rreth orës 13:00 të ditës së sotme, në lagjen 2 maji, në Vushtrri.
Policia e Kosovës ishte duke ndjekur një automjet, në të cilin dyshohej se udhëtonin persona të dyshimtë dhe janë qëlluar nga personat që ndodheshin brenda saj.
Bëhet fjalë për një makinë të llojit “BMW”. Në momentin që personat që ndodheshin brenda BMW-së, vunë re policinë që po i ndiqte, nxorrën kallashnikovin dhe filluan të qëllonin drejt efektivëve.
Policia është tërhequr nga ndjekja, ndërsa autorët e sulmit janë larguar në drejtim të fshatit Studime e të Sfaraqakut. Fatmirësisht, nga ky sulm nuk ka pasur policë të lënduar. Ndërkohë, efektivët janë vënë në ndjekje të autorëve.
