Në prag të derbit kryeqytetas Tirana-Partizani, lajmi që tronditi fansat e futbollit ishte infektimi i dy lojtarëve të demave të kuq.
Në skuadrën bardheblu natyrisht është ndjerë frika por ndërkohë ata e kanë të qartë rrugën që do ndjekin.
Drejtori sportiv i klubit Tirana ka thënë se i vjen keq që ka ndodhur një gjë e tillë përpara ndeshjes, por sipas tij nuk do të tërhiqen dhe zgjidhja është vetëm një: sfida duhet të luhet.
Në një prononcim për Panorama Plus, Arbi Laçi u shpreh se në dorë gjithë situatën e ka Federata, por bardheblutë janë që të luhet takimi, pasi kështu është protokolli i ndeshjeve në Kategorinë Superiore dhe nuk shtyhet ndeshja. “Frika ekziston, por për ne ndeshja duhet të luhet, duke zbatuar protokollin që ka publikuar federata, ndonëse është kjo e fundit që vendos gjithçka. Ne vetëm zbatojmë vendimet e saj”, është shprehur Laçi.
Sipas tij, është e pamundur që një sfidë e tillë të lihet për në fund, ndonëse për të gjithë shëndeti duhet të jetë në radhë të parë.
