Kanë rënë në prangat e policisë vëllai i ish-deputetit të Partisë Demokratike Andon Frrokaj bashkë me nipin, pasi pretendonin se kishin gjetur kurën për t’i shpëtuar pandemisë.
Bëhet fjalë për Frederik Frrokaj, 57 vjeç dhe nipi i tij Henri Frrokaj, 30 vjeç, banues në Mamurras.
Frederiku bënte thirrje në rrjetin social Facebook se kuronte virusin. Ai përziente acidin klorhidrik me ujë dhe sipas tij kjo ishte kura shëruese. Ndërsa nipi i tij ua shiste të interesuarve kundrejt pagesës 20.000 lekë të reja.
Ndërkohë, policia si provë materiale ka sekuestruar medikamente dhe preparate që shërbenin për të përgatitur ilaçin që këta shtetas tregtonin, si dhe pesë pajisje mjekësore pa faturë tatimore, të cilat dyshohet se mund të jenë futur kontrabandë.
Njoftimi policisë:
Finalizohet operacioni policor i koduar “Kuruesi i rremë”.
Operacioni nga strukturat e Hetimit të Krimit në DVP Lezhë, në bashkëpunim të ngushtë me Komisariatin e Policisë Kurbin dhe Lezhë.
Prodhonin ilaçe në mënyrë artizanale dhe ia shisnin qytetarëve me pretendimin se do t’i shëronte nga virusi, vihen në pranga nga Policia dy shtetas.
Sekuestrohet baza materiale, medikamente dhe preparate që shërbenin për të përgatitur ilaçin që këta shtetas tregtonin.
Specialistët për Hetimin e Krimit Ekonomik e Financiar në Drejtorinë Vendore të Policisë Lezhë kishin marrë njoftim se një shtetas që pretendonte se ishte mjek kishte arritur të prodhonte një ilaç që shërbente për t’u shëruar nga virusi.
Mbi bazën e këtyre informacioneve u regjistrua procedimi penal pranë Prokurorisë së Rrethit Gjyqësor Kurbin, për veprat penale “Prodhimi dhe shitja e ushqimeve dhe lëndëve të tjera të rrezikshme për shëndetin” dhe “Mashtrimi” dhe pas dy muaj hetimesh u bë i mundur identifikimi dhe lokalizimi i personit që kryente këtë veprimtari kriminale të rrezikshme në dëm të shëndetit të qytetarëve.
Bazuar në provat e grumbulluara u organizua dhe u finalizua operacioni policor i koduar “Kuruesi i rremë”, në kuadër të të cilit u kapën dhe u arrestuan në flagrancë shtetasit:
- F., 57 vjeç dhe nipi i tij, shtetasi H. F., 30 vjeç, banues në Mamurras.
Shtetasi F. F., nëpërmjet rrjetit social Facebook bënte thirrje për prodhim të substancave për kurimin e virusit nga një përzierje e acidit klorhidrik me ujë, duke pretenduar se me këtë përzierje kishte shpikur ilaçin për kurimin e këtij virusi.
Në kuadër të operacionit u kap në flagrancë në një lokal, nipi i shtetasit F. F, i cili po i shiste ilaçin një klienti.
Po në vijim të operacionit u bë kapja dhe arrestimi edhe i shtetasit F. F. Nga kontrolli në banesën e tij u gjetën baza materiale, medikamente dhe preparate që shërbenin për të përgatitur ilaçin që këta shtetas tregtonin.
Shtetasi F. F., pasi bënte prodhimin e këtyre medikamenteve në kushte artizanale dhe jashtë kushteve laboratorike, në kushte shtëpie, ia jepte shtetasit H. F., i cili, pasi takonte personat e interesuar, ua shiste atyre kundrejt pagesës 20.000 lekë të reja, me premtimin se shëronin pandeminë.
Në banesën e shtetasit F. F. janë gjetur dhe sekuestruar në cilësinë provës materiale dhe pesë pajisje mjekësore pa faturë tatimore, të cilat dyshohet se mund t’i ketë futur kontrabandë.
Materialet do t’i kalojnë Prokurorisë pranë Gjykatës së Shkallës së Parë Kurbin, për veprat penale “Mashtrimi”, “Prodhimi i kundërligjshëm i artikujve dhe mallrave industrialë e ushqimorë”, “Fshehja e të ardhurave” dhe “Tregtimi dhe transportimi i mallrave që janë kontrabandë”.
https://streamable.com/a8bjf4
