Ministri i Brendshëm, Sandër Lleshaj foli në lidhje me vrasjen e ndodhur mëngjesin e sotëm në Elbasan, ku Sokol Sanxhaktari dhe Adriano Hajdari goditën për vdekje Florian Lamçen.
Sipas Lleshaj, ngjarja e rëndë ndodhi për motive të qarta banale.
Viktima ishte një person me precedentë criminal. Ai u qëllua nga Sanxhaktari dhe Hadari, pasi ishin nën efektin e pijeve alkoolike, madje dyshohet se kishin konsumuar edhe kokainë.
Ministri foli edhe përsa i përket krahasimit të Elbasanit me Palermon, pasi qyteti italian njihet për ekzekutimet mafioze. Lleshaj u shpreh se nuk është keq që Elbasani t’i ngjante Palermos sepse është vërtet një qytet i çmuar
“Elbasani nuk është Palermo, dhe ju e dini më mirë se unë. Gazetarët përdorin shumë metafora, por kjo metaforë nuk është me vend. Nuk do ishte keq t’i thuash Elbasanit Palermo, se Palermo është një qytet mjaft i çmuar sot. Por duke iu referuar ngjarjeve të fundit kriminale, është e rëndësishme të mos dalim në konkluzione. Të paktën njëra prej ngjarjeve ka një motiv të qartë banal. Masat e marra nga policia kanë çuar në goditje shumë të forta të krimit në Elbasan. Pothuajse s’kemi ngjarje të pazbardhur. Nuk e shoh aq zi sa ç’e shihni ju”, u shpreh Lleshaj.