Në lidhje me shpërthimin e shifrave të koronavirusit ditët e fundit duke krijuar një situatë shqetësuese në vend, ka folur edhe mjeku i njohur Arben Gjata.
Gjata ka thënë se virusi nuk ka ikur, edhe pse njerëzit janë relaksuar për një moment dhe kanë menduar se është zhdukur.
Sipas tij arsyeja që ky shpërthim shkon tej parashikimeve është mosrespektimi i masave, si distancimi social, mbajtja e maskave etj.
“Pas hapjes, fillimet të aktiviteteve pritej një rritje dhe kjo rritje ndodhi, por është një rritje më e lartë sesa parashikimet. Kjo tregon që nuk janë duke u zbatuar masat, distancimi social, mbajta e maskave etj. Pati një lloj relaksimi të shoqërisë pas hapjes. Unë besoj që kjo është arsye kryesore. Virusi ka qenë gjithmonë këtu nuk ka ikur. Virusi është duke u përhapur dhe kjo është në dorë të qytetarëve. Duhet të zbatojmë rekomandimet që mos ndodhemi në situatë të papëlqyeshme”, u shpreh mjeku i njohur.
Ndërsa përsa i përket rikthimit të mundshëm të karantinës, Gjata deklaroi:
“Nuk besoj që do kthemi në karantinë. Unë shpresoj që shqiptarët të ndërgjegjësohen. Njerëzit, por jo vetëm njerëzit dhe personeli shëndetësor patën një relaksim. U duk sikur virusi iku. Por duhet të mësohemi me normalitet të ri, jo me normalitetin e dikurshëm.”
