Ditën e sotme kryeministri Edi Rama ndodhej në By Pass-in e Fierit, ku zhvilloi një inspektim në terren në këtë rrugë që tashmë është e hapur.
Së bashku me ministren e Infrastrukturës Belinda Balluku dhe kryetarin e Kuvendit Gramoz Ruci, kreu i qeverisë e konsideroi këtë si një transformim total, investim që do të jetë në dispozicion të publikut dhe do të shkurtojë rrugën për të shkuar në jugun e Shqipërisë me 30 minuta.
Gjithashtu Rama njoftoi se brenda muajit qershor, do të hapet gara për ndërtimin e aksit prej 120 km përgjat gjurmës së “Korridorit Blu”, Milot – Thumanë – Rrogozhinë – Fier, i cili do të lidhet pikërisht me Bypass-in e Fierit;
“Me mbylljen edhe të anëkalimit tjetër, mbyllet përfundimisht Bypass-i i Fierit dhe nga sot kjo vepër e rëndësishme është në dispozicion të publikut, me të gjitha standartet e garantuara pas rishikimit tërësor të projektit. Këtë javë nis asfaltimi në Bypass-in e Vlorës dhe hapet gara ndërkombëtare për projektin e Tunelit të Llogarasë. Brenda qershorit hapet gara për ndërtimin e aksit prej 120 km përgjat gjurmës së “Korridorit Blu”, Milot – Thumanë – Rrogozhinë – Fier, i cili do të lidhet pikërisht me Bypass-in e Fierit dhe do të transformojë qenësisht infrastrukturën rrugore të Shqipërisë Turistike,”– shkruan Rama krah videos.
