Ditën e djeshme Elbasani u trondit nga një atentat që iu bë njërit prej emrave më të njohur në qytet, Ardian Çapja.
Ndërkohë pas plagosjes ku arriti të shpëtonte mrekullisht, Çapja ka folur duke dhënë një dëshmi të shkurtër nga spitali në prani të hetuesve.
Fillimisht ai e ka mohuar të jetë qëlluar me armë zjarri, të njëjtin version që dha dhe familja më parë.
55-vjeçari ka mohuar se ishte qëlluar me armë, ndërsa theksoi se askush nuk mund ta vriste në shtëpinë e tij.
“Jam rrëzuar në banesë. Në shpatull më ka hyrë një hekur, në momentin që jam rrëzuar. Nuk jam plagosur me armë. S’më vret njeri në shtëpinë time”, mësohet të jetë shprehur Çapja për policinë.
Nga ana tjetër policia ka shoqëruar sot në mëngjes rreth 20 persona që mund të kenë dijeni për ngjarjen.
Gjithashtu janë sekuestruar kamerat e sigurisë në zonë, në tentativë për të zbuluar autorët dhe detaje të mëtejshme.
