“S’ka të larguar nga PD-ja”, Bardhi i përgjigjet Spiropalit

Sekretari i Përgjithshëm i PD-së, Gazmend Bardhi ka folur për rikthimin në parti të Genc Rulit nga kryetari Basha.

I ftuar në emisionin Kjo Javë, Bardhi u shpreh se nuk ka të larguar nga PD-ja, pork a zëvendësime dhe tërheqje. Ai tha se PD-ja ka 100 mijë anëtarë dhe ka potencial të propozojë jo 140, por 1400 kandidatë për deputetë.

Gazetarja: Spiropali tha për figurat që po rikthehen në PD, se ata vetë i përzunë dhe vetë i rikthyen, çfarë përgjgije keni për këtë?

Bardhi: Së pari fakti që komenton znj.Spiropali nuk do më detyronte mua të jepja një përgjigje, por duke qenë se ka folur për figura të PD-së, unë kam një mesazh. Nuk ka asnjë të larguar nga PD. Me kalimin e kohës siç ndodh në çdo parti, individë që kanë pasur poste të larta, zëvendësohen ose largohen nga këto pozicione. Por kjo nuk nënkupton largimin nga partia apo nuk kanë më kontribut për të dhënë. Në PD apo në çdo parti.

Gazetarja: Me këtë lëvizje që bëri Basha brenda PD-së mos do të thotë që po kalon më shumë përgjegjësi te kryesia?

Bardhi: Nuk bëhet fjalë për përgjegjësi, por për ndarje pushtetesh. Dua të them që ndryshimet statutore vijnë edhe për shkak të gabimeve që vetë kryetari i ka pranuar. Lista ka 140 kandidatë për deputet, por ne jemi parti me 100 mijë anëtarë, dhe ju siguroj që kemi potencial për të pasur dhe 1400 kandidatë për deputetë, me një cilësi dhe potencial për t’u vlerësuar.