“Shifër në nivelin e alarmit” Mjeku i njohur tregon arsyen pse u rritën ndjeshëm rastet e reja me COVID19

Rritja e ndjeshme e numrit të rasteve të reja me koronavirus në vendin tonë është bërë një problem shqetësues.

Vetëm ditën e djeshme u konfirmuan 36 të prekur, shifra më e lartë kjo që prej fillimit të pandemisë.

Ndërkohë në lidhje me këtë fenomen ka folur dhe epidemiologu i ISHP Dritan Ulqinaku.

Në programin “ABC e mëngjesit” ai është shprehur se shifrat e fundit janë një paralajmërim që ne duhet të jemi më të kujdesshëm.

Ai ka thënë se problemi kryesor është se qytetarët e harruan distancimin social dhe kjo ka sjellë rritjen e rasteve të reja.

“Një ndër problemet kryesore tek ne është se ne e kemi harruar fare distancimin social, duke bërë me dije se grupi më i kujdesshëm në të gjithë këtë duhet të jenë të pensionistët.

Është një shifër që është në nivelin e alarmit. Ne duhet të shqetësohemi më shumë për kapacitetet mjeksore dhe deri në 30 raste në dite sistemi i përballon, por me këtë shifër duhet të jemi më të vëmendshëm. Ne harruam shumë shpejt se çfarë ishte karantina. Nuk flas për 30 të shtruar, por 30 të infektuar.

Janë shtruar 7 shtrime të reja. Nuk është se janë në gjendje të rëndë, por është një person që ka rëndësi të jetë nën kujdesin e mjekëve. Kjo sëmundje ka treguar se mund të kthehet në një mënyrë të papritur dhe mund të marrë edhe jetë”, ka thënë Ulqinaku.

Gjithashtu mjeku ka bërë apel qytetarëve që të ruajnë distancën 1.5 metër, të mbajnë maskën në ambientet që janë me ajër të kondicionuar, në transportin urban dhe çdo gjë tjetër do të vijojë në normalitet.