Kryetarja e LSI-së, Monika Kryemadhi shpjegoi se identifikimi biometrik do të minimizojë manipulimet zgjedhore. Kryemadhi u shpreh se manipulimet nuk ndodhin në mes të Tiranës, por në zonat rurale.
“Ka zona që nuk gjen ujk dhe dhelpër jo të gjesh votues, dhe kjo ka ndodhur këtu, që mbushen kutitë.
Identifikimi biometrik e zgjidh këtë problem, pasi sa gjurmë gishtash do të ketë në aparaturën, aq fletë votimi duhet të ketë në kuti”, tha Kryemadhi.
Kryemadhi tha se Rama ka frikë nga zgjedhjet dhe këtë e ka treguar kur ska pranuar garë as me Ilir Zelën dhe as me Ben Blushin.
“Rama po tenton të bllokojë këtë reformë, që është pika e 1 e 15 kushteve, pasi ka frikë të përparojë me pikat e tjera, që janë zgjedhjet, Gjykata Kushtetuese, ajo e Lartë, e kështu me rradhë.
Rama po tenton që përgjegjësinë dhe fajin për mosplotësimin e kushteve të vendosura nga BE, t’ia lerë opozitës”, tha Kryemadhi.
Ajo tha se i takon Ramës që të sigurojë votat në Kuvend për miratimin e marrëveshjes. “PS ka dhënë garancinë, nuk i takon opozitës që të sigurojë votat”, tha ajo.
