Pandemia/ Si do veprohet nëse rriten rastet? Ky është skenari i ri i Ministrisë së Shëndetësisë

Pyetja që bëhet më shumë ditët e fundit në Shqipëri është se si do të veprohet në rast se vijon rritja e rasteve të reja me COVID19.

Ditë më parë ministrja e Shëndetësisë Ogerta Manastirliu deklaroi se nëse kjo do të ndodhë, do të trajtohen në Tiranë ku do happen spitalet e reja COVID.

Mesa duket ministria ka përgatitur dhe një skenar që më parë nuk dihej.

Bëhet fjalë për të kthyer spitalet rajonale në rrethe në spitale COVID.

Lajmin e ka bërë të ditur zyrtarja e ministrisë së Shëndetësisë, Mirela Cami teksa ndodhej  sot në qytetin e Shkodrës.

“Për momentin kujdesi për të infektuarit jepet në spitalin infektiv COVID1, por nëse kemi rritje të numrave mund të shfrytëzohen dhe spitalet rajonale. Për momentin kemi vetëm spitalin Infekriv. Në varësi të situatës do të merren edhe vendime të tjera. Numri i tamponëve nuk vjen si mungesë por sipas rekomandimeve të epidemiologeve”, deklaroi ajo.

Ndërsa drejtori i Spitalit të Shkodrës, Ardian Dajti u shpreh i gatshëm për të zbatuar vendimin e qeverisë.

“Lufta nuk ka mbaruar akoma, respektoni masat. Ne si drejtori nuk kemi ndryshuar asnjë masë, masat janë njësoj si në kohën e mbylljes, vazhdojmë të ndjekim të  njëjtat masa. Sa i takon trajtimit të të prekurve ne kemi kapacitete por kjo varet nga vendimi i qeverisë, nëse qeveria vendos që të prekurit të trajtohen në spitalin rajonal ne do i përgjigjemi”, tha ai.