Deputetja e opozitës parlamentare, Rudina Hajdari shprehu zhgënjimin e saj pasi mazhoranca dhe opozita nuk pranuan ndryshimin e sistemit zgjedhor.
Hajdari tha se e firmosi marrëveshjen pasi nuk donte të dukej sikur ishte e vetja që i dilte kundër rrugëtimit të Shqipërisë në Bashkimin Europian.
“E rëndësishme është hapja e rrugës së Shqipërisë drejt BE. Nuk ka qenë e lehtë, reforma duhet të kishte edhe elementë të tjerë. Për ndryshimin e sistemit zgjedhor nuk patëm kompromis. Nëse do të isha vetëm unë ajo që e bllokoja këtë marrëveshje, do të dukej se isha vetëm unë që nuk e doja BE-në. Duhet të jemi vigjilent që në Shqipëri nuk ka vetëm dëmtim të procesit të zgjedhjeve, ka edhe dëmtim të demokracisë. Ne sot jemi të vetëdijshëm se maxhoranca e ka kapur vendin dhe e përdor si plaçkën e vet. Të gjithë janë bërë koshient që ndryshimi i sistemit zgjedhor dhe hapja e listave, mund të garantojë që kushdo që të vijë pas Edi Ramës të mos sillet si Edi Rama. Uroja dhe shpresoja që ta përfshinim edhe këtë pikë”, u shpreh Hajdari.
