Një lajm i hidhur vjen së fundmi për mjekësinë shqiptare.
Mësohet se është ndarë nga jeta profesori dhe kirurgu i ortopedisë Panajot Boga.
Njoftimin për humbjen e madhe e ka bërë me dije Rektori i Universitetit të Mjekësisë Arben Gjata.
“Lamtumirë Profesor!
Sa trishtim lamtumira ndaj kollosëve të kirurgjisë dhe mjekësisë shqiptare!
Do na mungojë energjia e pashuar, dashamirësia e pamasë, profesionalizmi pa cak!
Do na mungosh njeriu Panajot Boga, por do mbetet mes nesh profesionisti shembullor me gjithçka na le trashëgim!”, shkruan Gjata në rrjetet sociale.
Shërbimi i Ortopedisë në Spitalin Ushtarak mori vite më parë emrin e Panajot Bogës, në nder të kontributit të madh që mjeku i njohur ka dhënë për këtë spital.
Por gjithashtu Boga është dekoruar me titullin “Mjeshtër i Madh” me motivacionin: “Për kontribut të shquar në mjekësinë shqiptare, veçanërisht në krijimin e zhvillimin e ortopedisë dhe traumatologjisë, në fushën e kërkimit shkencor e përgatitjen e shumë brezave të mjekëve të rinj.”.