LIGJET E BIZNESIT
Ditën e sotme maturantët kanë mbajtur një protestë përpara godinës së Ministrisë së Arsimit, ku shprehin pakënaqësinë e tyre në lidhje me zhvillimin e provimeve, sidomos atij të djeshmit për Gjuhën dhe Letërsinë.
Disa orë më pas, ka dalë drejtoresha e Qendrës së Shërbimeve Arsimore Rezana Vrapi në një deklaratë për shtyp ku ka folur në lidhje me këtë ngjarje.
Ajo ka deklaruar se nuk do të ketë një rivlerësim të provimit,pasi procesi është bërë brenda kornizave të një programi që vlerësohet nga ekspertët.
Vrapi ka shtuar se si rrjedhojë pretendimet e maturantëve nuk qëndrojnë dhe se asnjë nga pyetjet nuk ishte jashtë programit.
“Asnjë pyetje nuk është jashtë programit. Dua të bëj me dije se mënyra si bëhen pyetjet ka një procedurë rreptësisht të rregullt. Ne ndjekim procedura të përcaktuara në metodologjinë tonë, që kanë lidhje me nivelin e vështirësisë. Teza kalon në dy duar, që mbajnë përgjegjësi për anën shkencore dhe strukturore të testit. Nëse kanë pretendime për pyetje konkrete, se deri tani nuk kanë asnjë pyetje konkrete. Një nga arsyet pse testi u bë vetëm me alternativa, ishte ajo e korrigjimit, për shkak të pandemisë. Këto pyetje janë të mira, sepse masin nivelin e nxënësve. Procesi nuk ka përfunduar ende do bëjmë analizën, pastaj shpalljen e rezultateve. Nuk ka mundësi rivlerësimi, pasi testi nuk ka asnjë gabim shkencor. Pas datës 18 qershor ne do të bëjmë shpalljen e rezultateve dhe variatet. Ekipet thonë se nuk ka asnjë problem nëse mësuesit kanë dicka konkrete ta diskutojmë në një tryezë”, ka deklaruar ajo ndër të tjera.
