“Ju lutem dëgjojeni!” Shifrat e larta në Infektiv vënë në lëvizje Manastirliun, jep mesazhin e fortë (VIDEO)

Në komunikimin e përditshëm zyrtar Ministria e Shëndetësisë ka bërë me dije sot se në Spitalin Infektiv numri i të shtruarve ka shkuar në 82.

Pas këtyre shifrave shqetësuese, ka ardhur dhe reagimi i ministres Ogerta Manastirliu.

Ajo bën me dije se ka fluks qytetarësh që kanë nevojë për trajtim mjekësor si pasojë e simptomave të rënda të COVID19.

Manastirliu ka publikuar mesazhin e mjekes së Infektivit Nevila Gjermani, e cila u është drejtuar qytetarëve me një thirrje të fortë.

“Mjekët dhe infermierët e spitalit infektiv po përballen me një fluks të shtuar qytetarësh që kanë nevojë për trajtim mjekësor si pasojë e simptomave të rënda të COVID19. Nuk është asnjëherë e tepërt lutja e tyre për më shumë kujdes! Ju lutem dëgjoni apelin e dr. Nevila Gjermenit, e cila prej më shumë se 3 muajsh është çdo ditë në vijën e parë të përballjes me COVID19.”, shkruan Manastirliu krahas mesazhit të doktoreshës së Infektivit.

“Një lutje për të gjithë popullatën. Pavarësisht se gjërat shkuan mirë duam që të vazhdojnë të shkojnë mirë, ashtu sikurse e filluam. I lutem të gjithë popullatës të vazhdojnë të kujdesen për vetën dhe njerëzit e dashur duke zbatuar rregullat e higjienës dhe distancimit social”, shprehet Gjermeni ndër të tjera.