Nëna e 15-vjeçarit të dhunuar nga policia te Liqeni Artificial në Tiranë, ka marrë sot një vendim të papritur.
Kështu, Zaida Çobo ka vendosur të tërheqë padinë ndaj drejtorit të Policisë së Shtetit Ardi Veliu.
Ajo e ka ndërmarrë këtë hap pas takimit që zhvilloi sot me të por vetëm përsa i përket fyerjes, ndërsa për pjesën e dhunës ka deklaruar se do ta ndjekë deri në fund duke mos hequr dorë.
“Jemi njerëz mbi të gjitha. Padinë personale të tij po e kam tërhequr sepse jemi njerëz e duhet të japim një shembull pozitiv, ndërsa nga çështja e djalit jo, do ti shkoj deri në fund.” , ka deklaruar ajo për Abc News.
Kujtojmë se po sot, Policia e shtetit njoftoi se Veliu u takua me Çobon për t’i kërkuar personalisht ndjesë, për publikimin e një video ku ajo shfaqej me pistoletë në dorë.
Video më pas rezultoi të ishte filmuar me pistoletë gjatë xhirimeve të një filmi.
“Sot u takuam me zonjën Zaida Çobo, e cila me të drejtë u ndje e lënduar nga komenti im që mori edhe shumë kritika publike. Dëshiroja që ndjesën time publike t’ia bëja zonjës personalisht dhe më vjen mirë për mirëkuptimin e saj,” deklaroi numri 1 i Policisë së Shtetit Ardi Veliu.
