Gjykata ka dhënë masën e sigurisë për 21-vjeçarin Kreshnik Tusha, i cili akuzohet se ka vrarë dy biznesmenët Bujar Lika dhe Paulin Gjergji tre ditë më parë në Laç.
Kështu, mësohet se Tusha është lënë në qeli me masën “arrest me burg”, e cila iu komunikua në ambientet e spitalit të Traumës në të cilin ndodhet aktualisht pasi është plagosur në këmbë.
Ai po mbahet nën masa të rrepta sigurie me forca të shumta të policisë.
Kujtojmë se atentati ndodhi në një hotel në aksin rrugor Laç-Mamurras.
Dyshohet se shkak për këtë u bë një konflikt i hershëm mes autorit dhe dy viktimave.
Fillimisht atentatorët, mes tyre dhe Kreshnik Tusha, mbërritën te sheshi i një hoteli “AA” dhe gjuajtën me armë.
Si pasojë e plumbave humbi jetën Bujar Lika 37 vjeç dhe u plagosën Paulin Gjergji 53 vjeç dhe vetë Kreshnik Tusha.
Gjergji u transportua për në spitalin e Traumës në Tiranë ku nuk mundi të mbijetonte për shkak të plagëve të marra.
Ndërsa Tusha me ndihmën e bashkëpunëtorëve shkoi që të ndërrohej në shtëpi .Ai hoqi uniformën e Policisë së Shtetit, të cilën e mbante veshur në momentin që kreu atentatin dhe më pas shkoi në spitalin e Kurbinit.
Më vonë ai u nis për në spitalin e Traumës, ku po merr mjekim pasi është plagosur në këmbë dhe ndodhet jashtë rrezikut për jetën.
