“Do ndëshkoheni me gjoba!” ISHSH paralajmëron bizneset për masat kundër COVID19

Një paralajmërim i fortë vjen për të gjithë bizneset nga Inspektoriati Shtetëror Shëndetsor.

Ky institucion i bën thirrje kësaj kategorie të respektojnë masat mbrojtesë kundër përhapjes së COVID19, duke përdorur doreza dhe maska.

Drejtoresha Vjollca Braho këshillon zbatimin e protokolleve dhe  apelon që subjektet përkatëse mos të ulin vigjilencën.

Sipas saj, asnjë prej subjekteve nuk do të tolerohet në shkeljet që do të evidentohen.

“Ne kemi qenë në terren në të gjitha këto subjekte, por shikojmë një shkujdesje nga ana e subjekteve për masat mbrojtëse, siç janë maskat dhe dorezat. Ne i kemi këshilluar këto subjekte, por nga dita e sotme toleranca jonë do jetë zero dhe do ndëshkohet çdo subjekt që nuk i zbaton këto masa.

Iu bëj thirrje të gjitha subjekteve për marrjen e këtyre masave për të parandaluar përhapjen e Covid19,” shprehet Braho.

Inspektoriati Shtetëror Shëndetësor ka kryer deri më tani 67320 inspektime për të parandaluar përhapjen e Covid 19, si dhe ka vendosur 205 masa administrative ndaj atyre subjekteve, të cilat kanë qenë në shkelje të protokolleve të miratuara nga Ministria e Shëndetësisë.​​