“Besa mos ki frikë, dil jashtë” Tensionohet situata në protestë, maturantët qëllojnë me vezë godinën e Ministrisë

Maturantët kanë nisur protestën e tyre përpara godinës së Ministrisë së Arsimit.

Ata i kanë kërkuar ministres Besa Shahini që të dalë jashtë dhe tu përgjigjet kërkesave që ata kanë.

Gjithashtu një përfaqësi e tyre nuk kanë pranuar të dorëzojnë kërkesat që kanë në rast se nuk del një person përfaqëses zyrtar i ministrisë që të bëjë transparente tezat e provimit.

Maturantët kanë bllokuar rrugën para ministrisë, dhe kanë bërë thirrje: Besa dil përjashta, mos ki frikë.

Pas kësaj ata nuk janë ndalur me kaq por kanë hedhur dhe vezë në shenjë proteste.

“Do të bojkotojmë provimet e tjera të Maturës Shtetërore, nëse nuk marrim përgjigje mbi kërkesat tona”, shprehen maturantët.

Sipas tyre, tezat e dy provimeve, veçanërisht ai i Letërsisë dhe Gjuhës Shqipe, ishin absurde, me pyetje që nuk kishin lidhje me ato që dy javë më parë vetë Ministria e Arsimit i kishte sugjeruar për tu fokusuar.

“Testi nuk ishte i vështirë por i pazgjidhshëm. Ne u bazuam në testin që Ministria nxori dhe ishte ndryshe nga modeli dhe u zhgënjyem. Nuk dolëm aq mirë sa prisnim. Nuk u zbatua 40%, 20% dhe nuk kishte pyetje për nxënësit e nivelit të ulët dhe shumica e pyetjeve nuk ishte sikurse u nxorën në program. Të ulen kuotat.

Poezia është një prej gjërave më të rëndësishme dhe të vështira që ka letërsia, sidomos Lasgush Poradeci. Mund të them se dy poezi janë të tepërta, sidomos në periudhën e pandemisë”, kanë deklaruar ata të shqetësuar.