Forcat e Ndërhyrjes së Shpejtë kanë zbarkuar në Shkodër, ku është finalizuar operacioni policor i koduar “Mamurrasi”. Në fokus ka qenë kapja e personave në kërkim me rrezikshmëri të lartë shoqërore. Në kuadër të këtij aksioni të Komisariatit të Policisë Kurbin në bashkëpunim me FNSH Shkodër është arrestuar një 42-vjeçar për tentativë vrasjeje dhe armëmbajtje pa leje.
Në kushte të larta sigurie u bë kapja dhe prangosja e shtetasit Bardhok Noka, 42 vjeç, banues në Kurbin.
Për këtë shtetas, Gjykata e Rrethit Gjyqësor Kurbin ka caktuar masën e sigurisë “Arrest në burg”, për veprat penale “Vrasja me dashje, e mbetur në tentativë, e kryer në bashkëpunim” dhe “Armëmbajtja pa leje”.
Shtetasi Bardhok Noka, më 29.04.2020, në Mamurras, në bashkëpunim me një shtetas tjetër, ka qëlluar me armë zjarri në drejtim të një mjeti tip “BMË”, me drejtues shtetasin K. (N.). Sh. Materialet procedurale do t’i kalojnë Prokurorisë së Rrethit Gjyqësor Kurbin, për veprime të mëtejshme.
