Vdekja e 4-vjeçarit në Berat, në pranga drejtori dhe 5 specialistë në bashki

Pas ngjarjes së rëndë në qytetin e Beratit dje, ku humbi jetën një fëmijë 4 vjeç për shkak se ra në kontakt me rrymën elektrike ka ardhur reagimi nga policia e shtetit.

Përmes një njoftimi të shpërndarë për mediet, policia bën me dije se ka ndaluar drejtorin e shërbimeve në Bashkinë e Beratit, përgjegjsin e ndriçimit dhe 4 specialistë të tjerë të këtij sektori.

Mbi ta rëndon akuza për “Shpërdorim detyre”.

Njoftimi i policisë:

Humbi jetën fëmija 4 vjeç nga kontakti me rrymën elektrike, duke luajtur në lulishten në pedonalen e qytetit të Beratit, ndalohen Drejtori i shërbimeve në Bashkinë e Beratit dhe përgjegjësi i ndriçimit në zonat urbane, si dhe procedohen në gjendje të lirë 4 elektricistët e bashkisë.

Specialistët për Hetimin e Krimit në Komisariatin e Policisë Berat, në përfundim të veprimeve të kryera në lidhje me ngjarjen e ndodhur në lulishten në pedonalen e qytetit Berat, në bashkëpunim me Prokurorinë bënë ndalimin e shtetasve:

1. I., 32 vjeç, me detyrë Drejtor i shërbimeve në Bashkinë e Beratit dhe Ll. H., 61 vjeç me detyrë përgjegjës i ndriçimit në zonat urbane, të dy banues në Berat.

Arrestimi i këtyre shtetasve u bë pasi, shtetasi i mitur me iniciale A. B., 4 vjeç, duke luajtur në lulishten në pedonalen e qytetit të Beratit, ka gjetur vdekjen si pasojë e kontaktit me rrymën elektrike.

Po në vijim të veprimeve u proceduan penalisht në gjendje të lirë shtetasit F. T., H. I., E. B. dhe M. K., të katërt me detyrë elektricist pranë Bashkisë Berat.

Materialet i kaluan Prokurorisë së Rrethit Gjyqësor Berat, për veprën penale “Shpërdorim detyre”.