U kthye në vatër infeksioni/ Eugena Tomini tregon gabimin që ndodhi në QSUT

Ditët e fundit është vënë re një rritje e rasteve të reja me koronavirus në Tiranë, kryesisht në spitalin QSUT, ku janë infektuar një numër i konsiderueshëm mjekësh dhe pacientësh.

Në lidhje me këtë fenomen ka folur edhe shefja e epidemiologjisë në ISHP, Eugena Tomini ku ka sqaruar arsyen se përse ky institucion spitalor është shndërruar tashmë në një vatër të nxehtë infeksioni nga COVID19.

“Transmetimi i infeksionit i një personeli shëndetësor i cili ka pasur kontakt me burim të jashtëm nga QSUT, u kthye në një burim të brendshëm në qendrën spitalore, duke sjellë infektimin e personelit mjekësor. Sigurisht është një ulje e vigjilencës edhe përkundrejt stafeve mjekësore, përkundrejt një trendi të ulur të infeksionit covid në vend. Përkundrejt uljes së numrit të rasteve të shtruar në spital. Sigurisht edhe personeli shëndetësor hyn në pjesën e popullatës, janë njerëz si gjithë të tjerët, dhe kanë humbur vigjilencën.

Por respektimi i distancimit fizik, por mbi të gjitha i masave mbrojtëse të kontrollit të infeksionit spitalor është shumë i rëndësishëm, për të mos sjellë transmetim të ndërsjellë nga pacienti te personeli dhe anasjelltas”, ka deklaruar ajo për Ora News.