Sulmoi rektorin/ Shkarkohet nga detyra kryetarja e KIZ, Majlinda Keta (Vendimi)

Rektori i Universitetit të Tiranës, Mynyr Koni, ka shkarkuar pedagogen Majlinda Ketën. Në vendim thuhet se pedagogia ka kryer në sërë shkeljesh të cilat lidhen me masat e marra për periudhën e pandemisë së koronavirusit.

Keta, mban postin e kryetares së Komisionit Institucional Zgjedhor (KIZ) në Universitetin e Tiranës.

Ndonëse ky vendim vjen prag zgjedhjeve për rector dhe anëtarë të senatit, kujtojmë që Majlina Keta publikisht sulmoi rektorin e UT Mynyr Konin, duke u shprehur se vazhdon të bëjë luftë.

“Universiteti nuk drejtohet me bajraktarizëm. Ne jemi këtu për t’ju shërbyer studentëve”, ka pohuar ndër të tjera Keta në media.

Ndërkaq, vendimi argumentohet se kanë qenë disa shkelje të Ketës të cilat kanë çuar në shkarkimin e saj.

“Ka shkelur në mënyrë flagrante rregullorja për organizimin e zgjedhjeve për autoritetet dhe Senatin Akadamik të UT, duke përgatitur, formosur dhe dërguar me email edhe në formë shkresore dokumenta, të cilat janë në shkelje të rregullores së sipërcituar. Moszbatimi i shkresës së rektorit të UT për ndërprerjen e menjëhershme të veprimeve të paligjshme me pasoja për Universitetin”, thuhet ndër të tjera në vendim.

Reagimi i Majlinda Ketës

Ne kemi marrë të gjitha masat për të realizuar zgjedhjet, në mënyrë të qartë dhe të drejtë. Ne kemi riskuar deri ditën e fundit. Këto zgjedhje ishin detyrim ndaj Universitetit të Tiranës. Kemi marrë përgjegjësi në emër të Universitetit të Tiranës.

Rektori erdhi me një zhurmë të madhe dhe po iken jo në një mënyrë normale. MASR po kryen të gjitha procedurat, ndërsa iu jemi përmbajtur ligjeve e normave. Punët tona shikohen nga njerëz intelektualë, që kanë jetë publike, që kanë personalitetin e tyre. Di që edhe kolegët tanë në rrethe kanë shkuar shumë mirë.

Koni nuk ka komunikuar fare me ne dhe vazhdon të bëjë luftë me akuza, që në fund të fundit ndikojnë në prestigjin e UT. Këtu janë në lojë UT, por jemi para syve të një publiku që na jep taksa. Cdo denigrim i UT, cdo prekje e demokracisë së brendshme të universitetit, është dëmtim i Universitetit të Tiranës, duke dëmtuar inteligjencën e vendit. Universiteti nuk drejtohet me bajraktarizëm. Ne jemi këtu për t’ju shërbyer studentëve. Në përcaktimin e fituesit, ka votë edhe student.