Shembet Teatri Kombëtar. Shoqërohen në polici 20 persona

Është shembur në orët e para të mëngjesit Teatri Kombëtar. Forca të shumta policie rrethuan gjatë natës ambientet jashtë Teatrit, ndërsa në orën 4.30 fadroma ka shembur pjesën ballore të godinës. Artistët e grumbulluar për mbrojtjen e Teatrit, por edhe përfaqësues të shoqërisë civile që kanë qëndruar përgjatë gjithë natës në mbështetje të tyre kundër shembjes së godinës kanë bërë rezistencë.

Si rrjedhim, rreth 20 persona janë shoqëruar në polici, mes tyre edhe kryetarja e LSI, Monika Kryemadhi. Kjo e fundit më vonë u lirua dhe deklaroi se ndaj saj nuk u ushtrua dhune. Mes të shoqëruarve në polici janë Neritan Licaj, Astrit Qeranaj, Juli Emiri, Artan Manushaqe etj. Gjatë ditës do të vendoset nëse 20 personat e shoqëruar do të lirohen apo ndaj tyre do të vendoset masë arresti.